NA TÚA DECLARACIÓN DA RENDA PON A X A FAVOR DA IGREXA:
"POR TANTOS QUE NECESITAN TANTO"

O pasado día 1 de abril abriuse a Campaña da Renda 2007, que finalizará o próximo 30 de xuño. E como ben se sabe, a partir do 1 de xaneiro do presente ano 2008 a Igrexa en España recibirá dos contribuíntes, a través do Estado, unicamente o que estes desexen destinar marcando a casa correspondente nos impresos do IRPF. Ata o ano pasado, o Estado engadía dos Orzamentos Xerais unha cantidade máis a favor da Igrexa supondo moi ben que non era bastante o que a Igrexa percibía para levar a cabo tantas actividades. Así moitas necesidades fóronse cubrindo a partir dese plus de xenerosidade. Agora se os contribuíntes non marcasen a X, a Igrexa non percibiría nada.

Por iso é tan importante espertar a conciencia de todos os que se din católicos e aínda dos que non séndoo, desexan colaborar coa acción da Igrexa. Levamos xa 10 anos con esta campaña da “asignación de tributos” a favor da Igrexa. Agora o 0´7% do que xa temos que contribuír (tamén se a declaración resultase negativa) pode destinarse á Igrexa católica ou a “outros fins sociais”. Os Bispos incluso, e como o permite a lei, aconsellan marcar as dúas casillas a favor de ambas  opcións, porque polo visto non son excluíntes: así se axuda á Igrexa e, se se quere, tamén a outras “oenegués”… Por iso queremos recordar que:

   - Os católicos debemos colaborar co sostemento da nosa Igrexa, pondo a X na declaración, se a facemos persoalmente ou indicando que a poñan, se quen o fai é unha xestoría ou banco…

    - Se pedimos á Axencia Tributaria que nos faga o borrador, non nos porán a x a favor da Igrexa. Deberemos chamar nós para facer a oportuna modificación: ben por teléfono chamando ao 901 200 345/901 223344; ou por Internet, www.agenciatributaria.es, utilizando a clave que nos deron co borrador.
 
   - Para máis información: www.portantos.es