No marco da celebración do Ano Xubilar con motivo do VIII centenario da dedicación da catedral tudense, o sábado 13 de xuño, ás 18.00 horas, o templo catedralicio de Santa María de Tui acolle a conferencia-concerto «Vitae Mariae (parte III): Representación da virxe María ao longo da historia da arte». A iniciativa está organizada pola Asociación Coro de Voces Graves e Vigo, dentro do IV Ciclo de Música Ai Ondas, en colaboración coa Xunta de Galicia e o cabido catedral.
A doutora en Historia da arte, Ana Pereira Molares, impartirá a conferencia, mentres que Ensemble Vogal Ángel Barja, xunto con Consort Artificio Barroco de Vigo, ofrecerán un breve recital, no que interpretarán unha selección de obras marianas de autores galegos vinculados á diocese de Tui-Vigo.
O 20 de abril de 2025, a Santa Sede aceptou a petición do bispo de Tui-Vigo para a concesión do Ano Xubilar particular a esta diocese con motivo do 800 aniversario da dedicación da catedral tudense. Isto comporta tamén a concesión de grazas especiais en forma de indulxencia plenaria —manifestación concreta da misericordia de Deus, que supera os límites da xustiza humana e transfórmaos—. Por iso, este ano é unha oportunidade para«volver ás nosas raíces, ao que fomos e ao que somos», para que a catedral «se converta nunha casa de portas abertas e nun hospital de campaña» e «para comprender mellor o ser Igrexa», afirmou monseñor Antonio Valín durante a inauguración do Xubileu.