Desde o pasado 4 de xuño, a comunidade parroquial de San Antonio da Florida en Vigo prepárase para celebrar o seu día grande na honra ao seu patrón, mediante o rezo do rosario e da novena, previo á eucaristía todos os días ás 09:30 e 19:30 horas.
O sacerdote Jesús García Lourido, vigairo parroquial de Santiago de Vigo e membro do equipo de Pastoral Xuvenil, será o encargado de predicar o triduo solemne durante os días 10, 11 e 12 de xuño ás 20 horas.
O luns 13 de xuño, día de San Antonio, haberá misas ao longo de todo o día: pola mañá ás 9, 10, 11 e 12 horas; pola tarde, ás 18 e 19 horas. A eucaristía solemne seguida da procesión de imaxes polas rúas da cidade será ás 20 horas. Ademais, como é tradición, tras cada misa, haberá repartición de boliños e flores.
