Alentada polo lema xubilar «Esperanza, por onde andas? “E levantándose, volveron a Xerusalén” (Lc 24, 33)», a CONFER diocesana de Tui-Vigo celebrou, o xoves 9 de outubro, a súa Asemblea anual nos salóns parroquiais do Corazón de María en Vigo. Ao acto asistiron o bispo de Tui-Vigo, monseñor Antonio Valín, e o vigairo de Pastoral, José Vidal, para presentar o actual Plan Pastoral 2025-2026 e, máis especificamente, os cuestionarios pensados para os membros da vida consagrada co obxectivo de poder realizar unha análise da realidade diocesana.
Entre os asuntos tratados durante a asemblea, presentouse a memoria e o balance de actividades do curso 2024-2025. Tamén se compartiu o informe da Asemblea Xeral Anual de CONFER Galicia e o encontro cos bispos galegos, que tivo lugar no mosteiro de San Xoán de Poio durante o pasado mes de setembro..
O encontro tamén foi unha oportunidade para presentar as diferentes actividades que organiza a CONFER diocesana durante este curso 2025-2026 e que tamén están recollidas no Plan Pastoral da diocese tudense. Respecto ás propostas, a primeira será este sábado 18 de outubro, ás 11.00 horas, na capela do Fogar-Clínica Santo Rafael en Vigo, onde levará a cabo un xesto xubilar con motivo do Xubileu da Vida Consagrada, que se celebrou en Roma entre o 8 e o 9 de outubro.
Esta Asemblea anual da CONFER de Tui-Vigo finalizou coa elección dos membros da xunta. Posteriormente, relixiosos e relixiosas compartiron un pequeno ágape fraterno, celebrando tamén así o 50 aniversario da presenza desta institución na comunidade autónoma de Galicia.
