O sábado, 8 de febreiro, a parroquia da Nosa Señora de Lurdes en Mondariz-Balneario acolleu o encontro de formación e convivencia organizada pola delegación diocesana de Pastoral da Saúde para celebrar a Xornada Mundial do Enfermo, que a Igrexa en España convoca, nesta ocasión, baixo o lema «En esperanza fomos salvados». Tras a mañá de formación, os asistentes puideron gozar dun coloquio e vídeo fórum, así como un paseo e unha visita cultural pola vila.
A xornada foi unha oportunidade para profundar nos signos de esperanza que se poden ofrecer aos enfermos que están nas súas casas ou nos hospitais, tal e como pide o papa Francisco no número 11 da bula de convocación do Ano Xubilar 2025. Para iso, José Manuel González, enfermeiro no Hospital Álvaro Cunqueiro, ofreceu algúns plans de mellora que poidan fortalecer os vínculos e alimentar a esperanza daqueles grupos que visitan enfermos. Ademais, José Manuel, que nestes momentos tamén se atopa superando unha grave enfermidade, compartiu o seu testemuño de fe e a súa experiencia como voluntario facilitando o servizo relixioso no hospital e nos domicilios.
A delegación de Pastoral da Saúde anima a todas as parroquias a constituír grupos de visitadores que poidan acompañar na dor e achegar os sacramentos aos enfermos nas súas casas, residencias ou hospitais. Así, a diocese de Tui-Vigo poderá facer realidade as palabras do santo padre na bula de convocación do Ano Xubilar: «que se ofrezan signos de esperanza aos enfermos que están nas súas casas ou nos hospitais. Que os seus sufrimentos poidan ser aliviados coa proximidade das persoas que os visitan e o afecto que reciben […]. Que non falte unha atención inclusiva cara a cuantos achándose en condicións de vida particularmente difíciles experimentan a propia debilidade, especialmente aos afectados por patoloxías ou discapacidades que limitan notablemente a autonomía persoal».
A campaña do enfermo deste ano, en consonancia con o Xubileu 2025, leva por lema «En esperanza fomos salvados (Rom 8,24)». A Igrexa en España inicia esta campaña o 11 de febreiro, festividade da Virxe de Lourdes, coa Xornada do Enfermo a nivel mundial e péchase o 5 de maio, coa Pascua do Enfermo.
