«Hospitalitas. A graza do encontro» é o título da XXVII edición das Idades do Home que, con dobre sede en Villafranca del Bierzo e en Santiago de Compostela, conta con tres pezas procedentes da diocese de Tui-Vigo: un Santiago peregrino, datado do século XVI; un santo Domingo peregrino, de principios do século XV; e un san Bieito, obra do artista José Ferreiro do século XVIII. A exposición na sede compostelá poderá visitarse ata o próximo mes de novembro, na cripta do Pórtico da Gloria da catedral e no mosteiro de San Martín Pinario.
Tres pezas da diocese de Tui-Vigo nas Idades do Home
A hospitalidade, elemento presente desde os seus inicios na peregrinación xacobea, é o punto de partida desta exposición que comeza na cripta do Pórtico da Gloria, na catedral compostelá, onde se pode atopar unha selección de imaxes de Santiago o Maior, procedentes das diferentes dioceses de Galicia. Aí, áchase a imaxe en granito do século XVI e autor descoñecido dun Santiago peregrino procedente de TUDE Museo Catedralicio Diocesano. Sobre a orixe desta peza, Santiago Vega, delegado de patrimonio da diocese de Tui-Vigo, explica que «procede da catedral de Tui e é bastante probable presidise a capela á esquerda do altar maior que leva o seu nome. Esa capela, inicialmente foi románica, pero a finais do século XVI amplíase e modifica, quedando tal como a coñecemos hoxe».
Para continuar co percorrido da exposición, hai que trasladar desde a cripta do Pórtico da Gloria ata o mosteiro de San Martín Pinario, onde se atopan unha das grandes esculturas da diocese de Tui-Vigo: o santo Domingo peregrino que, en 2024, viaxou a Asís con motivo do VIII centenario da peregrinación de san Francisco a Compostela . Tamén, nesta parte da exposición, pódese contemplar a imaxe de san Bieito, atribuída a José Ferreiro, que, tal e como explica Santiago Vega, «é unha imaxe significativa que, ocasionalmente, ponse ao culto e formou parte dun retablo da catedral, agora desmontado».
As Idades do Home: «Hospitalitas. A graza do encontro»
A exposición que poderá visitarse na sede de Santiago de Compostela ten como punto de partida o concepto da hospitalidade, elemento presente desde os seus inicios na peregrinación xacobea. O Códice Calixtino sinala, no seu libro V/V, que «todos deben acoller con respecto e caridade aos peregrinos, xa sexan ricos ou pobres, que van ou volven do lugar de Santiago, xa que quen os acolla con caridade terá como hóspede non só a Santiago, senón tamén ao Señor, como ben din as palabras de Jesús no Evanxeo: “Quen vos acolle a vós, acólleme a min”».
A mostra desenvólvese en nove ámbitos, iniciando na cripta do Pórtico da Gloria, na catedral, na que o visitante pode descubrir unha selección de imaxes de Santiago o Maior, como Apóstolo e como peregrino. O resto de ámbitos vanse sucedendo en diferentes espazos do Mosteiro de Santo Martín Pinario. O relato expositivo detense nas iconografías de Santiago, as escenas propias da tradición xacobea e a importancia das peregrinacións no mundo cristián. Continúa mostrando a historia da catedral, como templo dos peregrinos, e os santos que peregrinaron a Compostela. A peregrinación a Santiago e a creación de estruturas de acollida, os ritos e costumes e os hospitais completan o relato. Finaliza o percorrido polos espazos dedicados ás ordes relixiosas e militares e ás catedrais que se foron conformando nas urbes dos Camiños a Santiago.
As Idades do Home é, hoxe en día, un dos proxectos máis emblemáticos en relación á posta en valor do patrimonio sacro de España. A súa orixe remóntase ata o ano 1988 e desde entón cóntanse vinte e seis edicións xa concluídas con máis de 5.200 obras expostas e máis de 12 millóns de visitantes.
