As delegacións de Pastoral Penitenciaria de Galicia reuníronse o pasado sábado 22 de marzo en Santiago de Compostela para a súa Xornada de encontro e formación baixo o lema «Por unha xustiza penitenciaria ao servizo da reinserción». O evento contou coa destacada intervención de Manuela Carmena, exmaxistrada e xuíza penitenciaria, recoñecida polo seu compromiso social e político.
Durante o encontro, expresouse a preocupación e compromiso das delegacións por un sistema penitenciario máis humano e orientado á reinserción, en liña cos valores constitucionais e evanxélicos de dignidade, perdón e conversión.
Avances recoñecidos As Pastorais subliñaron os progresos alcanzados no ámbito penal, como os módulos de respecto, a maior apertura á sociedade civil e as melloras no tratamento das mulleres reclusas. Tamén celebraron a introdución da xustiza restaurativa e as penas alternativas, así como a creación da REGAEP para mellorar a coordinación entre entidades colaboradoras.
Críticas ao sistema actual Non obstante, o manifesto denuncia varias problemáticas, como o descoñecemento social sobre as prisións, o aumento do punitivismo político e o acceso desigual á xustiza para colectivos vulnerables. Alértase ademais da situación de persoas con enfermidades mentais, a vulnerabilidade das mulleres reclusas e a orientación excesivamente controladora do sistema penitenciario.
Compromisos e demandas As Pastorais comprometéronse a impulsar medidas que respecten a dignidade das persoas reclusas, fomentar a xustiza restaurativa e sensibilizar á sociedade sobre a importancia da reinserción. Ademais, instaron á administración a reforzar o apoio á resocialización e dotar de recursos adecuados ás prisións.
Con estas iniciativas, as delegacións de Pastoral Penitenciaria de Galicia buscan incidir nun sistema penal máis xusto e humanitario, poñendo á persoa no centro do proceso de reinserción social.
