Tui viviu na mañá deste domingo un dos momentos máis esperados do inicio da Semana Santa coa tradicional procesión da Borriquita, que reuniu a unha multitude de veciños e visitantes nun ambiente marcado pola devoción e o bo tempo. A pesar do fresco propio destas primeiras horas do día, o sol brillou con forza, acompañando o recorrido da imaxe e realzando o carácter festivo da xornada. Desde primeiras horas, a cidade comezou a chearse de público, ata o punto de que a catedral viuse completamente abarrotada por fieis que non quixeron perderse a celebración.
A xornada comezou coa bendición dos ramos, trala que deu inicio a procesión da Borriquita, que recorreu as rúas do casco histórico entre palmas e olivos portados por numerosos nenos e familias. O ambiente combinou o recollemento coa alegría propia desta celebración.
Posteriormente, tivo lugar a misa na catedral, oficiada polo bispo emérito D. Luis Quinteiro, quen dirixiu unhas palabras aos asistentes centradas no significado da entrada triunfal de Xesús en Xerusalén e o inicio da Semana Santa.
A ceremonia estivo marcada pola solemnidade e a participación activa dos fieis. A gran afluencia de público confirmou, un ano máis, o arraigo desta celebración en Tui, consolidándose como un dos actos máis destacados do Domingo de Ramos na cidade.
