«Abrazando a vida, construímos esperanza» é o lema da Xornada pola Vida, que a Igrexa celebra o 25 de marzo, solemnidade da Anunciación do Señor. A Subcomisión para a Familia e a Defensa da Vida da Conferencia Episcopal Española foi a encargada de elaborar os materiais para a súa difusión. A celebración este ano adquire un relevo especial no contexto do xubileu 2025, convocado polo papa Francisco, co lema «Peregrinos de esperanza».
Nesta ocasión, os bispos da Conferencia Episcopal Española ofrecen, ao comezo da súa mensaxe, un dos signos de esperanza máis importantes que «consiste en ter unha visión da vida chea de entusiasmo para compartir cos demais».
Neste sentido, subliñan que esta visión esperanzada ten moito que ver con atopar o sentido da propia existencia. No medio desta sociedade de ruídos e présas, na que se mostra como camiño de felicidade a satisfacción de todos os desexos, os bispos indican que «resulta imprescindible convidar a unha reflexión profunda que axude a exporse as preguntas máis fundamentais: Que é o home? Cal é o sentido da dor, do mal, da morte, que, a pesar de tantos progresos feitos, subsisten aínda? Que valor teñen as vitorias logradas a tan caro prezo? Que pode dar o home á sociedade? Que pode esperar dela? Que hai despois desta vida temporal?».
