A delegación de Pastoral da Saúde da diocese de Tui-Vigo actualizou os datos de contacto dos servizos relixiosos hospitalarios, así como os horarios de misa dispoñibles nos diferentes centros da cidade olívica.
Tal e como explica o delegado diocesano, Benito Rodríguez, trátase dun servizo “para vivos e non para mortos”. Por iso, ademais de ofrecer os sacramentos da Reconciliación, a Comuñón e a Unción de enfermos, os capeláns están dispoñibles para o acompañamento espiritual e a escoita, non só dos pacientes ingresados, senón tamén dos familiares e demais persoas que os coidan.
Desde os servizos relixiosos hospitalarios, animan a propoñer este acompañamento a todos os enfermos e ás familias, co desexo de que se respecte o dereito á liberdade relixiosa tamén na última etapa da vida e, en caso de ser necesario, proporciónense os medios para a firma do testamento vital.
O vindeiro venres 11 de febreiro, a Igrexa celebra a Xornada Mundial do Enfermo baixo o lema «Acompañar no sufrimento», co que nos lembran que acompañar como consecuencia da enfermidade é unha obra de misericordia, ademais da finalidade fundamental da Pastoral da Saúde.
