O pasado 26 de novembro, o Secretariado para o Sostemento da Igrexa da Conferencia Episcopal Española estreou unha versión máis fácil e intuitiva do portal «Dono a mi Iglesia». Con esta remodelación, a Igrexa de España quere reducir o número de incidencias do portal e incrementar a usabilidade para os usuarios.
Grazas a este portal web, os fieis das parroquias da diocese de Tui-Vigo —e do resto de España— poderán colaborar de forma asidua e sistemática no sostemento da Igrexa cuxa misión e labor non podería realizar sen a contribución de cada unha das persoas que forman parte do pobo do Deus.
Ademais das achegas que se poden realizar a dioceses e parroquias, neste novo deseño incluíronse novos apartados de doazóns para seminarios e outras institucións eclesiais.
Con motivo desta remodelación, o Secretariado para o Sostemento da Iglesia lanzou unha campaña previa ao Nadal para visibilizar o novo portal e animar á colaboración co obxectivo de manter vivas as parroquias nesta época do ano. Para acceder ao portal, só fai falta acender a cámara do teléfono móbil e escanear o código QR que aparece no propio cartel informativo, dispoñible en castelán e en galego.
As parroquias interesadas en personalizar o seu cartel (clica na seguinte ligazón para ver un exemplo) poden poñerse en contacto coa Oficina de Medios de Comunicación Social a través do correo electrónico: medios@diocesetuivigo.org.