Durante a fin de semana do 19 e 20 de outubro, medio centenar de axentes de Pastoral Familiar de Galicia acudiron ao mosteiro de San Xoán de Poio, para manter o seu encontro anual de formación que, nesta ocasión, impartiu o vigués Fernando Vidal, doutor en socioloxía e profesor da Universidade Pontificia de Comillas, onde dirixe o Instituto da Familia; durante a fin de semana, presentou as diferentes metodoloxías que desenvolveron a través desta institución. Tamén asistiron, en diferentes momentos das xornadas, o bispo de Tui-Vigo, Mons. Antonio Valín, o prelado mindoniense, Mons. Fernando G. Cadiñanos e o vigairo de Pastoral da arquidiocese compostelá, Javier Porro.
O profesor Fernando Vidal debuxou, a grandes liñas, a situación actual que viven as familias no medio da sociedade e as principais dificultades que afronta a Igrexa na súa tarefa evanxelizadora. Así, subliñou a necesidade crear un tecido relacional en parroquias, delegacións e demais movementos eclesiais, desenvolver unha cultura narrativa que ensine a habitar as historias bíblicas ou activar e capacitar ás familias, entre outras cuestións. Tamén, insistiu na importancia de buscar ferramentas universais —para todos, crentes ou non crentes—, gratuítas e baseadas en novas pedagoxías, como poden ser «O reloxo das familias», «O reloxo dos noivos» ou «O reloxo da vida» —métodos sobre os que se puido profundar durante a fin de semana—.
O sábado pola mañá, o bispo de Tui-Vigo, Mons. Antonio Valín, asistiu tamén á formación no mosteiro pontevedrés. Ao final da formación inicial, o prelado tudense expresou que «seguimos a Cristo porque nos descubrimos amados e desexamos amar»; por iso, o matrimonio, como resposta de amor a un camiño de amor, é a vocación matriz e o seu fundamento [o amor] constitúe a raíz de todas as demais vocacións.
O domingo, o matrimonio formado por Tucho e María contou a súa experiencia tras realizar «O reloxo da vida», que os levou a acompañar a outras familias interesadas en sumarse tamén a esta iniciativa e a «O reloxo da vida», na cidade da Coruña, onde residen. Eles, acompañados de Fernando Vidal, foron os encargados de dirixir unha pequena dinámica incluída no método «O reloxo das familias».
O encontro finalizou coa celebración da eucaristía presidida polo bispo de Mondoñedo-Ferrol, Mons. Fernando G. Cadiñanos, e concelebrada polo vigairo de Pastoral de Santiago de Compostela, Javier Porro. Durante a súa intervención, o prelado mindoniense destacou o servizo como unha actitude fundamental nas relacións familiares, para poder así fermentar o mundo coa alegría do Evanxeo da que fala o papa Francisco no seu exhortación apostólica Amoris Laetitia.
Con carácter anual, as delegacións de Pastoral Familiar de Galicia organizan un encontro de formación para fortalecer o traballo en rede entre as distintas Igrexas locais e compartir as principais dificultades e retos do traballo cotián neste ámbito pastoral. Ademais, este encontro responde a un dos obxectivos específicos da Pastoral Familiar de Tui-Vigo para o curso 2024-2025: promover o encontro e a formación dos axentes de pastoral familiar.