Baixo o lema «A familia, fonte de esperanza», a casa diocesana de exercicios espirituais, «Via Lucis» en Santiago de Compostela acolleu, entre o 18 e o 19 de outubro, o Encontro de Axentes de Pastoral Familiar de Galicia. A atención ás persoas maiores, ás familias de persoas privadas de liberdade ou a aquelas que conviven coa enfermidade do alcoholismo, así como o acompañamento de noivos foron os temas que centraron o encontro. O bispo de Tui-Vigo, monseñor Antonio Valín, acudiu ao encontro o domingo para agradecer o labor de todos aqueles implicados na Pastoral Familiar da comunidade autónoma.
O sacerdote da diocese de Tui-Vigo e formador do Seminario Maior Interdiocesano «Apóstolo Santiago», Ángel Carnicero Carrera, foi o encargado de inaugurar estas xornadas de formación cun relatorio titulado «Exercitarnos na esperanza». A través de diferentes imaxes, textos bíblicos e testemuños, convidou os asistentes a identificar os diferentes signos de esperanza e desesperanza que se poden atopar a nivel persoal, matrimonial, familiar, eclesial e social, pero tamén incidiu na importancia de identificar actitudes, disposicións, compromisos, ámbitos, prioridades e accións que axuden a ser testemuñas de esperanza hoxe.
Álvaro Medina del Campo, director de Pastoral do Maior da diocese de Xetafe e ex-presidente nacional de Vida Ascendente, abordou o tema da pastoral dos maiores. Durante a súa intervención, presentou o «Plan Rut», unha iniciativa que ten como obxectivo acompañar ás persoas maiores que están soas nas residencias, e o proxecto «O amigo chámate», que busca paliar a soidade os maiores que viven sós.
Pola tarde, Rodrigo Jesús Carcedo González, profesor titular do departamento de Psicoloxía Evolutiva da Educación da Universidade de Salamanca e director do servizo HIPRIFAM (Servizo de Atención Psicolóxica a Fillos de Persoas en prisión e as súas Familias), ofreceu algunhas claves para o acompañamento de familias de persoas privadas de liberdade. A asociación «Al-Anon», presente na Coruña, Santiago e Vigo, presentou o seu traballo de apoio ás familias que conviven con persoas afectadas pola enfermidade do alcoholismo, concluíndo así a formación da xornada do sábado.
O domingo, o matrimonio da diocese de Tui-Vigo, Ángela Rosa Romero e Leandro Rivero, presentaron o proxecto «EnREDaDos» para o acompañamento de parellas non casadas sacramentalmente. Partindo dun novo estilo e de novas estratexias de linguaxes, a iniciativa ofrece unha axuda valiosa e actual para colaborar como Igrexa cunha Pastoral Familiar cada vez máis eficaz, na que as parellas poidan sentir a vida un pouco máis humana.
Tamén durante a mañá do domingo, o arcebispo de Santiago de Compostela, monseñor Francisco José Prieto, fíxose presente neste encontro de formación, compartindo un momento de proximidade e alento cos axentes de pastoral familiar de Galicia. A súa visita foi recibida con gratitude polos participantes, que valoraron as súas palabras de ánimo e o seu compromiso coa realidade das familias galegas.
Durante a súa intervención, monseñor Prieto destacou que a familia é o lugar orixinario da esperanza, o primeiro espazo onde se aprende a esperar: esperar ao outro, confiar, acompañar os procesos con paciencia e a crer no futuro, mesmo no medio da fraxilidade. Así, o arcebispo lembrou as palabras do papa Francisco nas que o pontífice definía a a familia como o taller onde se forxa a alma dun pobo.
En relación co Ano Xubilar que a Igrexa está a celebrar baixo o lema «Peregrinos de esperanza», o prelado compostelán subliñou que o Xubileu se concreta na renovación dos vínculos interpersoais, na reconciliación e na curación das feridas, no redescubrir a alegría de estar xuntos. Por iso, expresou monseñor Francisco José, a familia preséntase como escola de esperanza para o mundo, unha realidade na que, nunha sociedade marcada pola soidade e o individualismo, o amor cotián convértese en signo profético da esperanza. O arcebispo concluíu declarando que, baixo a mirada de María, nai da esperanza, cada familia pode redescubrir a súa vocación de ser fogar onde Deus habita.
Ao longo de toda a fin de semana, preto de oitenta persoas asistiron a estas xornadas no que, ademais de formarse para poder acompañar mellor ás familias nas súas diferentes situacións, tiveron a oportunidade de gozar de momentos de fraternidade e oración. O encontro finalizou coa eucaristía dominical presidida polo sacerdote franciscano, Miguel da Mata.
Con carácter anual, as delegacións de Pastoral Familiar de Galicia organizan un encontro de formación para fortalecer o traballo en rede entre as distintas Igrexas locais e compartir as principais dificultades e retos do seu labor cotián neste ámbito pastoral. Ademais, este encontro responde a un dos obxectivos específicos da Pastoral Familiar de Tui-Vigo para o curso 2025-2026: promover o encontro e a formación dos axentes de pastoral familiar.