Onte, como cada terceiro domingo de xullo, a parroquia de San Miguel de Bouzas celebrou a ofrenda ao Bo Xesús dos Aflixidos presidida polo bispo de Tui-Vigo, Mons. Luís Quinteiro Fiuza e realizada pola rexistradora da propiedade en Vigo, Margarita Alconchel Saiz-Pardo.
Durante a ofrenda, que ten lugar tras a lectura do Evanxeo, Margarita Alconchel Saiz-Pardo destacou o labor da Cáritas —tanto a nivel diocesano como parroquial— nos seus esforzos por “aliviar as escasezas que sofren os nosos irmáns máis necesitados”. Ante o Bo Xesús dos Aflixidos, a oferente manifestou: “amadísimo Cristo, veño, vimos, a ofrecerche a nosa caridade e a pedirche que nos deas un corazón xeneroso que senta a dor do irmán como propio, para que saibamos darnos, coa nosa oración e os nosos bens, a eles”.
Pola súa banda, Mons. Luís Quinteiro convidou aos alí congregados a transmitir con sinxeleza a devoción do Bo Xesús dos Aflixidos que definiu como “unha festa chea de emoción, de entusiasmo e piedade; unha festa encarnada en todo o mundo”. Neste sentido, exhortou a toda a comunidade parroquial a converterse “nunha Igrexa en saída que non se encerra en si mesma porque hai moitas persoas que buscan a vida”, lembrando ademais que “o compromiso cristián non nace dun razoamento, senón dun corazón tocado polo amor de Deus”.
Previamente á celebración da ofrenda, a parroquia celebrou a novena en honra ao Bo Xesús dos Aflixidos coa participación do sacerdote diocesano Antonio Menduiña, doutor en Biblia e reitor do Seminario Menor de Tui, que acudiu a predicar desde o xoves e ata o sábado.
