Mensaxe con motivo da campaña «Contra a fame» de Mans Unidas
9 de febreiro de 2025
Moitas veces, cando xorden dificultades, optamos por mirar a outro lado e non complicarnos. Xa temos bastante coas nosas leas, desgustos e ocupacións diarias; ademais, que imos facer; é demasiado para nós… Algo así sucedeu tamén entre os discípulos de Xesús cando despois de predicar, facéndose tarde, propóñenlle a
Xesús que envíe á xente a buscarse comida. Ninguén contaba coa resposta de Xesús «dádelles vós de comer»; á realidade de que había moi pouco que compartir e que era iso para tantos, Xesús convida co «dádelles vós de comer».
Unha vez máis celebramos a campaña de Mans Unidas e, nesta ocasión, lémbrasenos algo moi concreto: compartir é a nosa maior riqueza. É necesario aprender a mirar a realidade de maneira diferente, loitando contra a indiferenza e comodidade que nos encerra só na nosa realidade, desvanecendo o que moitas persoas viven cada día. É urxente poñer a riqueza mundial (e a persoal) ao servizo de toda a humanidade para loitar contra a pobreza, a fame e tanta desigualdade. Como nos di o papa Francisco, habemos de camiñar cara a unha prosperidade compartida, onde se consolide unha vida digna para todos (para todos!), onde fomentemos moito máis a cultura do encontro respectuoso e onde a persoa estea sempre no centro, sobre todo os descartados. É necesario converternos a un estilo de vida distinto, no que as nosas prioridades vaian máis aló do benestar persoal, cunha maior inclusión das persoas descartadas e un maior coidado medioambiental.
Ese novo estilo do que nos fala Mans Unidas e o papa Francisco hase de facer realidade en todas as dimensións da nosa vida; por iso é polo que esa prosperidade compartida fundaméntese no ideal inspirado na vida de S. Francisco de Asís, un ideal totalmente alternativo: unha vida sinxela, a xustiza social e o respecto pola natureza. Así a prosperidade poderá chegar a todas as persoas sen excluír a ninguén.
Como cada ano, Mans Unidas convídanos a vivir a súa campaña «Contra a fame» cunha xornada de xaxún voluntario, o venres 7 de febreiro —sentindo e compartindo a necesidade que moitos irmáns viven cada día— e coa xornada do domingo 9. Non é quedarnos só no sacrificio do xaxún ou no donativo —oxalá moi xeneroso— que poidamos facer. Urxe un cambio de conciencia e facer todo o necesario para que a prosperidade sexa universal. A nosa prosperidade non pode estar só na acumulación indefinida e insaciable de bens materiais: compartir é a nosa maior riqueza, sempre! É urxente un ser e un facer máis xusto unidos aos demais, recoñecendo nosa interdependencia e o coidado da casa común e dos que habitamos nela. Unha prosperidade que nos leve ao compromiso compartido e ao benestar comunitario, onde cada persoa sexa única e fundamental, prioritaria, e onde non haxa “privilexiados”.
Unha vez máis, nesta campaña, quero agradecer o traballo gratuíto e continuo de tantos voluntarios e voluntarias de Mans Unidas; a colaboración xenerosa e calada de tantos colaboradores que comparten o que teñen, e o testemuño de quen cre que se pode vivir de maneira alternativa buscando unhas relacións humanas e unha sociedade máis digna. Son un berro provocador e unha luz de esperanza que brilla con forza no medio de tanta escuridade. Con esa luz levan adiante a imperiosa invitación de Xesús: «dádelles vós de comer». Palabras que resoan con forza na realidade dos discípulos e que seguen resoando na actualidade en cada un de nós. A invitación está lanzada, esta é a nosa urxencia.
Con afecto de irmán e amigo
