Mensaxe con motivo do Día da Igrexa Diocesana, 10 de novembro de 2024
Co paso dos anos imos facendo miles de preguntas —entre estas: como organizarmos a vida, que facer neste mundo que nos toca vivir, de que maneira…— e hai que recoñecer que non é fácil dar unha resposta. Como seguidores de Xesús, aquel que nos provoca e cuestiona sempre, esas preguntas formúlanse de moitas maneiras: «Pedro, ámasme?», «Vide comigo e fareivos pescadores de homes», «Sígueme»… En todas, a iniciativa sempre vén de Xesús que nos convida a estar con el e a seguilo.
Para quen es? Esta é a cuestión dos seguidores de Xesús. Cada un temos de facernos a pregunta: a que misión nos envía Xesús, a que entrega, a que nos chama?. Non é un tema para un grupo de selectos; non, é froito da nosa vocación bautismal. Todos somos chamados á vida polo Deus que nos ama; chamados ao amor que se expresa nunha relación persoal con ese Deus; chamados a vivir o reino e a anuncialo presente no mundo; chamados a construír Igrexa e a traballar nela, porque todos somos discípulos-misioneiros na Igrexa e no mundo.
Esta chamada concrétase en accións, estilos, iniciativas… compromisos concretos na comunidade. Celebramos neste mes de novembro o Día da Igrexa Diocesana lembrándonos o noso compromiso persoal e comunitario na nosa diocese. Para quen son? Somos luz nesta Igrexa particular de Tui-Vigo. Aquí respondemos á chamada que nos fai o Señor e aquí concretamos o noso compromiso compartindo a vida e a fe, o tempo e a nosa tarefa, as ilusións e accións, os nosos recursos humanos, pastorais e económicos.
Busca no teu interior o sentido da túa vida. Neste momento e nesta terra, nesta Igrexa que camiña en Tui-Vigo, es convidado a ser a voz dos que non teñen voz, a ilusión de quen comeza cada día, a proximidade cos máis desfavorecidos, o compañeiro dos máis pequenos, o amigo dos que buscan, o Evanxeo que se fai compromiso real… e facelo na comunidade-Igrexa dos seguidores de Xesús. El convida a cada un a seguilo, a deixar atrás o que nos ata e lanzar as redes no seu nome.
Hoxe tamén Xesús nos di: «ámasme? Sígueme!». Hoxe e cada día, espidos ante Deus e os irmáns, temos que preguntarnos: para quen son?
Ti, para quen es?
