Coincidindo coa festa da Presentación do Señor, o domingo 2 de febreiro, a as 19.00 horas, o bispo de Tui-Vigo, Mons. Antonio Valín, presidirá a eucaristía na concatedral-basílica de Santa María en Vigo, para celebrar a Xornada Mundial da Vida Consagrada, que, este ano, a Igrexa convoca baixo o lema «Peregrinos e sementadores de esperanza». Previamente, ás 17.30 horas nos locais parroquiais, a CONFER de Tui-Vigo organiza un encontro de confraternización para coñecer e compartir as diferentes actividades sociais que as comunidades de vida consagrada están a realizar na diocese tudense.
A Xornada Mundial da Vida Consagrada céntrase nas persoas que, a través da consagración, dedican a súa vida por completo a Cristo e destaca a beleza das vocacións destas persoas —calidade que nace das alegres noticias que portan e transmiten—. No marco do Ano Xubilar, a Igrexa chama a todas as persoas a ser «peregrinos e sementadores de esperanza». Un camiño cara a Deus propio de todos os bautizados e que anticipa os dons celestiais na peregrinación.
Na mensaxe publicada con motivo desta xornada, os bispos da Conferencia Episcopal Española presentan a estas persoas como estandartes da devandita peregrinación que, á súa vez, esparexen as sementes da esperanza no seu camiño. Durante a Xornada do pasado 2024, o papa Francisco puxo en valor a paciencia dos consagrados na súa espera diaria en Cristo e animou a observar esta virtude. Tamén destacou os «corazóns novos» das persoas consagradas, que non desisten na súa espera nin se renden no camiño da esperanza.