Ao redor de sesenta persoas das parroquias de San Lourenzo de Arnoso, San Salvador de Cristiñade, San Xulián de Guláns, San Martiño de Moreira e San Salvador de Nogueira peregrinaron este domingo, 26 de xullo, ata a catedral de Santa María de Tui para celebrar o Ano Xubilar convocado con motivo do 800 aniversario da dedicación do templo. Acompañados polo seu párroco, Gonzalo Otero, os peregrinos iniciaron a marcha ás 6.00 horas desde a igrexa de Guláns e percorreron a pé o camiño ata a cidade episcopal.
Á súa chegada, uníronse a outros fregueses que acudiron polos seus propios medios para participar na eucaristía dominical, celebrada na catedral e amenizada polo coro parroquial. A xornada concluíu cunha comida de confraternización. Para o párroco, a peregrinación foi «unha fermosa mañá de domingo compartindo andaina, conversación e convivencia. Hoxe podemos dicir que camiñar crea comunidade».
Desde o inicio do Ano Xubilar, son numerosos os grupos de parroquias, movementos e asociacións eclesiais que peregrinaron ata a catedral para celebrar este VIII centenario. O templo tamén acolleu durante estes meses encontros diocesanos e nacionais, como a festa do Clero de Galicia ou as Xornadas Nacionais de Patrimonio Cultural de la Iglesia, poñendo de manifesto a súa condición de corazón espiritual da diocese.
O Ano Xubilar conmemora os oitocentos anos da dedicación da catedral de Santa María de Tui. Foi o 1 de decembro de 1225 cando o bispo Esteban Egea consagrou o templo como sede episcopal. Oito séculos despois, esta efeméride convida a redescubrir a catedral non só como un edificio de extraordinario valor histórico e artístico, senón tamén como a igrexa nai da diocese, signo de comuñón co bispo e con toda a Igrexa.
