O xoves 4 de decembro, ás 20.00 horas, a parroquia da Nosa Señora da Soidade en Ou Castro organiza unha nova sesión de «Coloquios na Soidade», dedicada aos moitos aspectos descoñecidos do beneditino tudense Frei Rosendo Salvado: un dos personaxes máis interesantes da Historia de Galicia e desta diocese de Tui-Vigo. O historiador tudense Rafael Sánchez Bargiela dará conta de todas as facetas esquecidas do seu apostolado, sobre todo, do seu legado como misioneiro, escritor e exemplo e modelo de evanxelizador integral.
Frei Rosendo Salvado foi un misioneiro extraordinario, «músico, escritor, teólogo e pai conciliar no Vaticano I, humanista e emprendedor. Evanxelizador dos aborixes de Australia Occidental, bispo, viaxeiro, defensor dos dereitos humanos. Comparable, nalgúns aspectos, a personaxes como o capitán Cook ou a David Livingstone». «Salvado é, cos pais Sarmiento (1695-1772) e Feijoo (1676-1764), un dos tres grandes beneditinos universais estreitamente vinculados con Galicia». Por iso tamén haberá que aproveitar para desmentir de maneira rotunda a única crenza falsa que calou fondo no imaxinario popular: a suposta introdución do eucalipto en Galicia polo pai Salvado.