O mércores 24 de xullo, ás 20.00 horas, a igrexa de Santo Domingo en Tui acollerá o concerto extraordinario do Coro Infantil e Xuvenil Cantabile da Coruña, durante o percorrido da súa xira polas terras do Miño galaico-portuguesas. Este concerto, con entrada libre ata completar aforo, está organizado en colaboración coa Asociación «Amigos da Catedral de Tui».
Esta agrupación coral, dirixida por Pablo Carballido del Camino interpretará o Gloria RV 589 de Antonio Vivaldi. Esta composición, tamén coñecida como o «Gloria» de Vivaldi, é unha das obras máis destacadas do período barroco italiano. A. Vivaldi, recoñecido polo seu talento como compositor e violinista, logrou nesta peza unha combinación brillante de coros e solistas, creando unha atmosfera sublime e emocionante.
O Coro Infantil e Xuvenil Cantabile nace froito da asociación que leva o seu mesmo nome como un gran proxecto musical e social que integra nenos, nenas, mozos e mozas, tendo á música clásica como fío condutor. Desde o seu nacemento en 2002 e ata a actualidade, converteuse nun referente musical en toda a Galicia, grazas ao gran número de concertos e xiras que realizan tanto no panorama nacional como internacional —Viena, Salzburgo, Lisboa, Boloña, Madrid, Roma…—. Ademais, os numerosos premios recibidos e a crítica avalan a súa traxectoria interpretativa e, especialmente o seu son e técnica vocal, debidas ao seu director Pablo Carballido del Camino, tenor e mestre de canto.
Cantabile gravou xa seis discos, entre os que destacan a banda sonora da película «De Profundis» —estreada xunto á Orquesta Sinfónica de Galicia—; o disco dedicado á obra vocal sacra de Vivaldi avalado polo musicólogo José López Calo; «Mozart y Haydn en las voces de Cantabile»; ou o último proxecto, «Palabras de Luz: doce pezas corais inéditas», galegas e en galego, que foi premiado na sétima edición dos Martín Códax da música galega, na categoría de «Coros e grupos vocais».