A delegación de Ensino Relixioso Escolar da diocese de Tui-Vigo, coa colaboración do Instituto Teolóxico Compostelán, organiza un curso de formación para profesores de Relixión, durante os días 22 e 23 de novembro, no Seminario Maior «San Xosé» e na escola de Maxisterio CEU San Paulo. En total, o curso terá unha duración de 8 horas: o venres 22, de 17.15 a 21.30 horas; e o sábado 23, de 09.30 a 14.00 horas.
«Acompañamento educativo no Ensino Relixioso Escolar» é o título do relatorio que impartirá María Iglesia Jones, colaboradora da Editorial Edelvives en temas de Pedagoxía. Durante a formación abordaranse os diversos estilos educativos que se poden dar entre os docentes, os diferentes tipos de alumnado que podemos ter, xunto coa especificidade da misión do profesor de Relixión.
O curso consta dun máximo de 100 prazas e o prazo para formalizar a inscrición finaliza o 20 de novembro. Os profesores de Relixión interesados en participar deben enviar un correo electrónico a capeans@edu.xunta.gal, indicando os seguintes datos: título da actividade —«Curso Vigo», tamén valería—, nome completo, DNI e datos completos do centro de destino —concello, provincia e diocese—.
