O luns 11 de novembro, ás 17.30 horas, os locais parroquiais de San Xosé Obreiro e Santa Rita en Vigo acolleron o primeiro seminario de formación, organizado por Cáritas Diocesana de Tui-Vigo e dirixido a todas as persoas voluntarias da diocese tudense. «Economía integral, economía circular» foi o título desta primeira sesión formativa que impartiu María Luz Jorge Fuente, responsable do proxecto téxtil de Cáritas Moda re- que, desde a súa fundación, xerou xa 35 empregos de inserción social.
Ao longo de todo o curso pastoral 2024-2025, Cáritas Diocesana de Tui-Vigo programou 3 seminarios de formación para o voluntariado. Ademais desta primeira cita que transcorreu onte, en febreiro , desenvólvese a segunda sesión ao redor do tema da cooperación fraterna e, en maio , o terceiro e último encontro no que se expoñerán os diferentes programas diocesanos que levan a cabo desde a entidade caritativa da Igrexa en Tui-Vigo.
Cáritas Diocesana de Tui-Vigo, durante este curso pastoral, quere fortalecer a participación e pertenza de todas as persoas involucradas coa entidade, establecendo novos procesos que respondan as necesidades identificadas conforme o lema institucional «Alí onde nos necesites, abrimos camiños de esperanza». Estes seminarios de formación son un medio para incrementar, precisamente, a participación do voluntariado, á vez que reciben formación para unha mellor atención e acompañamento das persoas vulnerables que acoden ás diferentes Cáritas.
