O venres 16 de maio, tivo lugar en Porto do Son o encontro de seminaristas maiores da provincia eclesiástica de Santiago de Compostela —conformada polas dioceses de: Lugo, Mondoñedo-Ferrol, Ourense, Santiago e Tui-Vigo—. A esta xornada asistiron tamén algúns bispos diocesanos, así como os equipos formadores e algúns diáconos.
A este encontro acudiron os seminaristas do Seminario Interdiocesano «Santiago Apóstolo», acompañados do arcebispo de Santiago de Compostela, Mons. Francisco José Prieto e do bispo de Tui-Vigo, Mons. Antonio Valín; tamén os seminaristas da diocese de Ourense, tanto do Seminario diocesano Divino Mestre como do Seminario Diocesano Misioneiro Redemptoris Mater, acompañados polo seu bispo, Mons. José Leonardo Lemos; da diocese de Lugo, acudiron os seminaristas do Seminario Diocesano e Misioneiro Redemptoris Mater, acompañados por Mons. Alfonso Carrasco.
O encontro comezou cunhas palabras de acollida por parte do bispo de Ourense, quen foi o convocador e anfitrión deste encontro.
Despois, diáconos, seminaristas e formadores foron repartidos en grupos de traballo, durante os que conversaron acerca da orixe da propia vocación, como se senten coa chamada que recibiron e como ser testemuñas desta vocación.
Terminados os traballos, tivo lugar a celebración da Eucaristía, presidida polo arcebispo de Santiago de Compostela, Mons. Francisco José Prieto e concelebrada polos demais bispos presentes e formadores. Na súa homilía, destacou a importancia da vocación, que é «don para a doazón».
Tras celebrar a Eucaristía, os asistentes a este encontro tiveron unha comida de fraternidade.
Fonte: Diócese de Lugo.
