O sábado, 11 de xullo, ás 20.00 horas, o Templo votivo do Mar de Panxón acollerá a tradicional Ofrenda do Mar. Cada ano, a delegación diocesana de Stella Maris é a encargada de escoller ao oferente que, nesta ocasión, será Enrique Fernández Álvarez, antigo alumno da primeira promoción do orfanato nacional «Virxe do Carme» de Panxón, con motivo do cincuentenario do seu peche. A celebración estará presidida polo bispo de Tui-Vigo e promotor de Stella Maris en España, monseñor Antonio Valín.
Tras a misa e un momento de adoración eucarística, terá lugar desde a porta do templo a bendición dos mares co Santísimo sacramento.
A Ofrenda do Mar de Panxón , que cada ano se celebra no Templo Votivo, é a homenaxe de fe e devoción que as catro mariñas —a armada, a mercante, a frota pesqueira e a deportiva— realizan á virxe do Carme.
Na súa mensaxe con motivo do «Día das xentes do mar», monseñor Antonio Valín, promotor de Stella Maris en España, expresa que «a pastoral do Mar non é algo accesorio; é unha resposta necesaria, unha presenza que acolle, acompaña e defende a dignidade de quen vive en tránsito constante. E é a Igrexa que sae ao encontro achegándose ás fronteiras, tamén ás invisibles fronteiras do mar. E é a Igrexa que nos lembra que o importante son as persoas, todas, as que traballan no mar e as que quedan en terra».
Foi no ano 1939, cando o templo votivo de Panxón celebrou por vez primeira a Ofrenda do Mar que, ademais de ser unha homenaxe das mariñas á Virxe, converteuse nunha oportunidade para resaltar o papel dos mariños e visibilizar os graves problemas que afectan as súas vidas e familias. A Igrexa universal reforza a conmemoración do «Día das xentes do mar» que se celebra todos os anos, o 16 de xullo, facéndoo coincidir coa festa católica da Virxe do Carme.
Desde 1944, tras a Asemblea Nacional do Apostolado do Mar que tivo lugar en Bilbao, a diocese de Tui-Vigo foi un referente para toda España na defensa e protección dos dereitos do mariño, grazas ao labor desenvolvido no coidado dos traballadores e as familias que dependen do mar.