Con motivo do Día Mundial das Persoas Refuxiadas que se celebrou o 20 de xuño, a ONG xesuíta en Vigo, Entreculturas, organiza unha camiñada de hospitalidade, o sábado 24 de xuño, ás 12 horas, desde o colexio Apóstolo Santiago ata o parque A Riouxa de Teis, onde haberá unha comida compartida —co que leve cada participante— e actividades infantís —está previsto finalizar ás 13.30 horas—. A través desta iniciativa, a asociación xesuíta con presenza na cidade olívica convida a toda a sociedade viguesa a «xerar unha cultura de hospitalidade, solidariedade e inclusión que estea baseada na paz», para construír o futuro.
A iniciativa, tal e como explican desde Entreculturas, é «unha boa oportunidade para atoparnos coas distintas entidades que traballamos por un mundo máis xusto e, de forma especial, convidar os colectivos de persoas migrantes aos que acompañamos, porque é con eles cos que temos que construír unha sociedade de acollida, inclusiva, intercultural e de paz».
