Durante os días 22 e 23 de marzo, no colexio Maristas Santa María de Tui, unha ducia de parellas participaron no retiro anual para matrimonios que organiza o movemento Equipos da Nosa Señora (ENS) da diocese de Tui-Vigo. Nesta ocasión, o retiro foi impartido baixo a dirección do sacerdote diocesano Luís González Cedeira, párroco de Santa Lucía de Vigo e San Pedro de Sárdoma. Durante a eucaristía de clausura, as parellas puideron dar grazas polos seus cónxuxes e renovar as súas promesas matrimoniais.
José Manuel e María del Pilar, responsables do sector Vigo-Pontevedra, explican que, durante esa fin de semana, «meditamos como Deus nos chama sempre, ao fío dese versículo da Apocalipse “estou á porta e chamo”. Isto supón ver como entra na nosa vida persoal, nas nosas circunstancias concretas, cando estamos dispostos a escoitar a súa voz. E, así, podemos tratar de descubrir que quere o Señor de cada un e tomar conciencia de que somos criaturas amadas e o seu amor é un amor entregado, porque nos regalou a vida».
Seguindo as indicacións do director espiritual do retiro, «descubrimos que Deus nos acolle na debilidade visitando o noso sepulcro, e resucítanos con el . Isto ten que levarnos a agradecer todo o que nos deu e poñelo ao seu servizo e ao dos irmáns. Quédanos a tarefa de levalo á práctica na vida cotiá», seguindo as palabras de santo Ignacio de Loyola «en todo, amar e servir».
Tal e como explican os responsables do sector Vigo-Pontevedra, o retiro anual «é unha oportunidade única para afastarnos da rutina e conectar máis profundamente coa misión que Deus ten para nós como Igrexa e como matrimonio». O fundador de ENS, o padre Caffarel, explicaba que «de tempo en tempo a nosa fe debilítase, pero polo efecto da Palabra de Dios ela esperta, fortalécese e, de novo, adquire vida. O retiro fai posible abrirnos a nós mesmos e ao sopro da Palabra de Deus». Este retiro permite revitalizar a vida persoal e conxugal, poñendo, en primeiro plano, a Deus, que «fai máis fecundo o noso sacramento do Matrimonio, permitíndonos regresar á fonte do noso amor».
