O papa Francisco faleceu este luns, 21 de abril, aos 88 anos de idade, en Romasegundo anunciou o cardeal Kevin Joseph Farrell, cardeal camarlengo. A Santa Sede fíxoo público ás 10.00h. cun comunicado:
Hai pouco, o cardeal Kevin Joseph Farrell, anunciou con tristeza o falecemento do Papa Francisco, con estas palabras:
«Queridos irmáns e irmás, con profunda dor debo anunciar o falecemento do noso Santo Padre Francisco. Ás 7.35 desta mañá, o Bispo de Roma, Francisco, regresou á casa do Padre.
Toda a súa vida estivo dedicada ao servizo do Señor e da súa Igrexa. Ensinounos a vivir os valores do Evanxeo con fidelidade, valentía e amor universal, especialmente en favor dos máis pobres e marxinados.
Con inmensa gratitude polo seu exemplo de verdadeiro discípulo do Señor Xesús, encomendamos a alma do papa Francisco ao infinito amor misericordioso do Deus Un e Trilo».
O papa Francisco impartiu onte a bendición apostólica Urbi et orbi
O papa Francisco, que saíu do hospital o pasado 28 de marzo tras unha longa hospitalización de 37 días por unha pneumonía, apareceu en público por última vez onte domingo de Resurrección na praza de San Pedro, para dar a tradicional bendición Urbi et orbi.
Jorge Mario Bergoglio S.J foi elixido Papa o 13 de marzo de 2013, adoptando o nome de Francisco, en agradecemento a san Francisco de Asís, o santo da pobreza, a paz e a humildade. Converteuse así no 266º papa da historia da Igrexa católica e no primeiro pontífice americano e xesuíta. O seu lema para o seu Pontificado foi: Miserando atque eligendo.
Comezaba así o seu camiño, que continuaba durante 12 anos, de acompañamento na fe como pastor da Igrexa, de anunciar a alegría do Evanxeo, en comuñón, cunha misión aberta a todos e sempre preocupado polos máis desfavorecidos.
Grazas, papa Francisco!
Durante todo o seu Pontificado o Papa Francisco confesou que chegaba das periferias para servir á Igrexa e á humanidade. Desexou «unha Igrexa pobre e para os pobres». E en multitude de ocasións, desde a primeira vez que impartiu a Bendición apostólica Urbi et orbi, desde o balcón da Basílica de San Pedro, pediu: «por favor, non esquezan de rezar por min».
Agora nestes momentos dolorosos, pedimos ao Señor polo seu descanso eterno e mostramos o noso agradecemento pola súa vida posta ao servizo da Igrexa. Unímonos en oración, a todo o Pobo de Deus, coa esperanza na resurrección.