A delegación de Pastoral Xuvenil e Universitaria da diocese de Tui-Vigo puxo en marcha dúas iniciativas para dar continuidade ás actividades de primeiro anuncio que vén realizando desde o ano 2020 —Ceas Alpha e «Unha luz na noite»—, pero que están abertas a todos os mozos que queiran continuar crecendo e profundando na súa fe. «For(you)mate» e «Ven e verás» son os títulos de ambos os proxectos que, cunha periodicidade semanal, prolongaranse durante o mes de marzo e abril.
«For(you)mate» é un espazo de formación para discipular aos mozos, é dicir, para espertar a súa vocación e compromiso evanxelizador. Neste sentido, os mozos son os principais protagonistas encargados de organizar e desenvolver cada sesión formativa, sempre baixo o acompañamento de sacerdotes e outros mozos adultos. Os encontros, que comezaron o 20 de febreiro e se prolongarán ata o 16 de abril, terán lugar nos locais compartidos da delegación de Pastoral Xuvenil e Universitaria, situados en García Barbón, 29, os martes ás 20 horas.
«Ven e verás» ofrece unha oportunidade para profundar na lectura da Biblia e en diferentes aspectos da figura e vida de Jesús. Para iso, utilizarán a serie The Chosen —que se pode seguir en aberto a través da web da serie—. As sesións serán os venres, ás 19.15 horas —do 1 de marzo ao 26 de abril—, tamén nos locais da rúa García Barbón, 29.
A través destas iniciativas, a delegación de Pastoral Xuvenil e Universitaria da diocese de Tui-Vigo quere consolidar a creación de espazos de reflexión e formación, nos que a mocidade poida crecer na identificación, pertenza e corresponsabilidade eclesial. Á súa vez, busca poñer de manifesto entre os mozos e mozas a necesidade de que sexan protagonistas na construción da Igrexa e da evanxelización.
