Máis de 270 nenos e nenas da diocese de Tui-Vigo participaron no Encontro Diocesano da Catequese organizado pola delegación diocesana de Catequese no colexio Maristas de Tui, o pasado sábado 20 de maio, de 10.30 a 19 horas. Con esta xornada festiva, a delegación consegue o seu obxectivo de xerar espazos de encontro entre nenos e adolescentes de diferentes realidades parroquiais, para celebrar e compartir xuntos a alegría da Catequese.
Ao longo de todo este curso, a delegación diocesana de Catequese estivo traballando para crear este tipo de espazos de encontro, non só para nenos, senón tamén para catequistas, co dobre obxectivo: ofrecer unha formación continua e establecer unha rede de contacto entre todos os axentes implicados no proceso de maduración de nenos e mozos que se preparan para recibir os sacramentos de iniciación cristiá.
