Mozos e mozas procedentes dunha vintena de realidades eclesiais da diocese de Tui-Vigo participaron no encontro vocacional, que a delegación de Pastoral Vocacional organizou o sábado 15 de marzo, no Seminario Maior «San Xosé» de Vigo. Baixo o lema «Atopeite», ofreceuse un espazo de escoita e acompañamento, no que os mozos puidesen profundar na súa fe e compartir as súas inquietudes con outros mozos da diocese tudense.
«O teu mellor eu», «O mapa dos soños», «Rede de encontros», «Preguntas para a alma» e «Decide o teu camiño» foron os títulos dos cinco talleres. A través de diferentes xogos en equipo e de momentos de silencio, os mozos e mozas puideron entrar nunha dinámica de discernimento que lles axudaba a exporse os grandes interrogantes da vida, especialmente, aqueles relacionados coa vocación.
A oración estivo presente ao longo de todo o encontro: ao comezo , grazas á meditación ofrecida por Antonio Menduiña, reitor do Seminario Menor «San Paio» de Tui, e, ao final, na capela do Seminario vigués, onde os mozos e mozas ofreceron as súas peticións, desexos e esperanzas, a Jesús, o mestre e amigo.
Tal e como explicou Ángel Carnicero, delegado de Pastoral Vocacional de Tui-Vigo, «o mes de marzo sempre nos regala unha oportunidade para reflexionar sobre a vocación cristiá á que todos fomos chamados; unha vocación que para cada un de nós se colorea cunha modalidade especial». Ademais da xornada para mozas, a delegación diocesana tamén organiza un encontro formativo para axentes de pastoral que, nesta ocasión, virará ao redor do Congreso nacional de Vocacións —celebrado en Madrid, entre o 7 e 9 de febreiro de 2025, baixo o lema «Para quen son? Asemblea dos chamados para a misión»—; o encontro, previsto inicialmente para o 22 de marzo, trasladouse ao sábado 10 de maio, de 10.00 a 13.30 horas, no seminario vigués.
