Co obxectivo de contribuír ao benestar dos mariñeiros en colaboración coas empresas armadoras e as institucións portuarias, a delegación de Stella Maris da diocese de Tui-Vigo puxo en marcha a campaña «Gorros que non só abrigan». Mediante esta iniciativa convidan a persoas particulares, a parroquias, a centros de maiores e a todas aquelas institucións que queiran colaborar, a calcetar gorros para regalar durante este Nadal aos mariñeiros que están lonxe das súas casas.
O 15 de decembro finaliza o prazo para entregar os gorros calcetados. As persoas que desexen colaborar poden poñerse en contacto coa delegación a través dos seguintes números de teléfono: 986 202 944 e 696 145 154.
En anos anteriores, grazas á colaboración de voluntarios, da Autoridade Portuaria de Vigo e de empresas do sector privado, Stella Maris conseguiu, mediante a repartición de caixas de produtos do Nadal e gorros calcetados a mans, dulcificar a situación de illamento e ausencia familiar de 80 mariñeiros da frota de altura cuxos barcos arribaron en Vigo durante as datas festivas.
