Cada ano, o penúltimo domingo de outubro —o «mes das misións»—, a Igrexa celebra o Domingo Mundial da Misións, máis coñecido como o DOMUND, para rezar polos misioneiros e colaborar coas misións. O domingo 20 de outubro, Obras Misionais Pontificias promove esta xornada baixo o lema «Ide e convidade a todos ao banquete»; para iso poñen ao dispor de catequistas e axentes de pastoral diversos materiais que axudan a visibilizar e concienciar acerca da misión.
Na súa mensaxe para o Domund, o papa Francisco agradece o labor que realizan «os misioneiros e misioneiras que, respondendo á chamada de Cristo, deixaron todo para ir lonxe da súa patria e levar a Boa Noticia alí onde a xente aínda non a recibiu ou acolleuna recentemente». Tamén destaca que a «a misión universal require o compromiso de todos. Por iso, é necesario continuar o camiño cara a unha Igrexa ao servizo do Evanxeo completamente sinodal-misioneira […]. Por tanto, unha estreita cooperación misioneira resulta hoxe aínda máis urxente e necesaria na Igrexa universal, así como nas Igrexas particulares».
Na actualidade, España é o segundo país que máis diñeiro doa ás misións, só por detrás dos Estados Unidos. Tamén é un dos países que máis persoas envía aos territorios de misión: actualmente hai rexistrados 9.932 misioneiros españois. No ano 2023, o Fondo Universal de Solidariedade da Obra da Propagación da Fe (DOMUND) reuniu 61.402.193,95 euros; deles, 8.914.063,91 euros foron recadados en España. Grazas á xenerosidade dos españois que colaboran co Domund, durante o pasado ano, puidéronse financiar 366 proxectos en 170 diocese, distribuídas por 29 países de todo o mundo.
Obras Misionais Pontificias (OMP) —unha das catro obras que conforman a institución Obra da Propagación da Fe— é o leito da Igrexa para o sostemento dos Territorios de Misión e a promotora do Domund. A súa fundadora, Pauline Jaricot, foi declarada beata en 2022.
