O martes 25 de marzo, ás 19:00 horas, nos locais parroquiais do Corazón Inmaculado de María en Vigo, a delegación de Pastoral Familiar da diocese de Tui-Vigo organiza unha mesa redonda en base a cinco experiencias baixo o lema «Abrazando a vida, construímos esperanza». Trátase de celebrar a Xornada pola Vida que, nesta ocasión, está marcada pola celebración do Ano Xubilar 2025, convocado polo papa Francisco baixo o lema «Peregrinos de esperanza»
A mesa redonda estará montada ao redor de cinco testemuños para abordar a defensa da vida desde diferentes perspectivas e experiencias vitais: a teolóxica, a da dor e o sufrimento, a da vellez e a das dificultades no seo da familia —viuvez, separacións, perdas, etc.—. Os intervenientes na exposición son: Edgardo Quintana, sacerdote dominico e presidente da CONFER de Tui-Vigo —reside en Vigo desde hai 4 anos—; Ana M. Mariño, voluntaria da Pastoral da Saúde, leva máis de tres décadas acompañando a persoas maiores en residencias; M. Carmen Pereira, nai de familia, acompaña a persoas separadas desde a Pastoral Familiar; Ángela Romero, mestra, casada, coach de acompañamento familiar e voluntaria do Centro de Escoita de Vigo; e Francisco Cabaleiro, sacerdote e capelán de hospital desde hai 25 anos.
Tras a mesa redonda, ás 20.30 horas, o bispo de Tui-Vigo, monseñor Antonio Valín, presidirá a eucaristía no templo parroquial.
«Abrazando a vida, construímos esperanza» é o lema que se propón para a Xornada pola Vida 2025. Na mensaxe publicada con motivo desta xornada, os bispos de España afirman que un dos signos de esperanza máis importantes consiste en ter «unha visión da vida chea de entusiasmo para compartir cos demais». Neste sentido, subliñan que esta visión esperanzada ten moito que ver con atopar o sentido da propia existencia. No medio desta sociedade de ruídos e présas, na que se mostra como camiño de felicidade a satisfacción de todos os desexos, os bispos indican que «resulta imprescindible convidar a unha reflexión profunda que axude a exporse as preguntas máis fundamentais».
