5/10/2022

,

Santa María Faustina Kowalska
5/10/2022

,

Santa María Faustina Kowalska

Nota informativa da reunión dos Bispos da Provincia Eclesiástica de Santiago

Nota informativa da reunión dos Bispos da Provincia Eclesiástica de Santiago

Tivo lugar en Santiago de Compostela, o 22 de setembro, a reunión ordinaria dos Bispos da Provincia Eclesiástica de Santiago, que comprende as Dioceses de Santiago de Compostela, Tui-Vigo, Lugo, Ourense e Mondoñedo-Ferrol.

Os Bispos trataron diversas cuestións sobre o inicio do curso pastoral 2020-2021, nas circunstancias complexas que vivimos debido á pandemia do Covid19 e que afectan o traballo habitual nas parroquias, as escolas, as familias e o conxunto da sociedade.

Os Bispos, en continuidade coa súa recente Nota e segundo as indicacións da Congregación para o Culto Divino, animan aos fieis para volver á normalidade da vida cristiá participando na Misa dominical e festiva cunha presenza física, sempre que as circunstancias permitan facelo sen risco para a saúde. Lembran que a participación na Eucaristía é a fonte perenne e inesgotable da vida cristiá.

Queren aproveitar tamén a ocasión para agradecer o labor dos sacerdotes e dos voluntarios, e a cooperación de todos os fieis que, ao poñer en práctica as medidas de prevención, hixiénicas e organizativas previstas, fixeron dos templos, lugares seguros fronte ao contaxio do coronavirus.

Exhortan aos sacerdotes e colaboradores parroquiais, en particular, a que sigan cumprindo con responsabilidade os protocolos diocesanos e as recomendacións das autoridades sanitarias, para ben de todos os fieis que acoden ás nosas igrexas nestes tempos de pandemia.

Así mesmo chaman a todos os cristiáns a confiar no amor fiel de Deus, que non abandona nunca ao seu pobo no momento da proba, e a reavivar o don da caridade para poder estar á beira de todos, con xestos concretos de solidariedade e agarimo. Neste sentido, valoran o traballo das Cáritas diocesanas e de todos os servizos caritativos das parroquias e centros de atención aos necesitados, moi particularmente ás persoas soas e enfermas, así como aos nenos e ás familias vulnerables.

Os Bispos animan a todos a empezar o curso pastoral con coidado responsable e con esperanza, a exemplo de María, nai da Igrexa.

Santiago, 22 de setembro de 2020

Facebook
Twitter
Email
WhatsApp