18/04/2021

,

III Domingo de Pascua

O bispo de Tui-Vigo agradece o labor da vida consagrada

O bispo de Tui-Vigo agradece o labor da vida consagrada

Os acordes de Abre mis puertas do grupo de música católico  Ain  Karem anunciaron o inicio da celebración  eucarística que o bispo de Tui-Vigo, Luís Quinteiro, presidiu para celebrar a Xornada Mundial da Vida Consagrada que a Igrexa celebrou o pasado martes, 2 de febreiro, coincidindo coa festa da Presentación de Xesús no Templo. A música asolagou o Corazón de María —situado na rúa Honduras de Vigo— pero no templo non había nin rastro do coro.

Un centenar de persoas, moitos deles relixiosos e relixiosas de vida consagrada, reuníronse para festexar o seu día grande nunha convocatoria que quere revalorizar o testemuño de quen elixiu seguir a Cristo de preto. A través da canle de Youtube da parroquia, unha trintena de pantallas visualizaban a misa en directo, probablemente, os membros das comunidades que, por idade ou por aforo, non puideron asistir  presencialmente ao acto.

O bispo, Luís Quinteiro, agradeceu o labor realizado polas diferentes comunidades de vida consagrada presentes na Diocese de Tui-Vigo que se converteron nun piar fundamental para o desenvolvemento da actividade pastoral e  caritativa. Neste sentido, o pastor da Igrexa pediu, ao fío da lectura da primeira carta aos Corintios, que «os consagrados e consagradas continúen manténdose como ese espello de vida nova que nos transmiten unha parábola de fraternidade» encarnando as palabras proclamadas de San Paulo «ai de min se non anuncio o Evanxeo!».

Actualmente, a Diocese de Tui-Vigo conta con cincuenta e seis comunidades de vida consagrada —vida  contemplativa, activa e  apostólica, máis dous institutos seculares— con presenza en oito parroquias da cidade de Vigo, dezaseis centros educativos e nove centros de acollida social. En total, tal e como explicaba o delegado diocesano para a Vida Consagrada, Alfredo García, no programa de COPE O espello de Tui-Vigo, o pasado venres 29 de xaneiro, estas cincuenta e seis comunidades suman trescentos sesenta e sete consagrados —douscentos oitenta e oito mulleres e setenta e nove homes—.

Na eucaristía  estiveron especialmente presentes os consagrados e consagradas falecidas no último ano por mor da pandemia do covid-19: irmán José María Núñez Lamas, salesiano; sor Mariña Vázquez Fernández,  clarisa de Tui; irmá María Jesús Núñez, das franciscanas hospitalarias de Tui; e dona Conchita Lacruz Cuervo, da Alianza de Jesús por María. Tamén se fixo mención especial a esas congregacións que este ano están de especial celebración: a Orde de Predicadores (Dominicos) polo oitavo centenario da morte o seu fundador, Domingo de  Guzmán; as irmás  xesuitinas da Compañía de Xesús polo 150 aniversario da súa fundación; e as franciscanas do Divino Pastor polo 25 aniversario da  beatificación da súa fundadora, Ana María  Mogas.

Share on facebook
Facebook
Share on twitter
Twitter
Share on email
Email
Share on whatsapp
WhatsApp