O vindeiro martes, 21 de decembro, ás 18 horas, o bispo de Tui-Vigo, Mons. Luís Quinteiro Fiuza, presidirá a Eucaristía no templo parroquial de San José Obreiro e Santa Rita para celebrar o Advento con movementos, asociacións laicais e delegacións diocesanas que teñen a súa sede no edificio de Vázquez Varela. Ademais, durante a misa lembrarase aos diferentes membros destes grupos que faleceron ao longo deste último ano.
Como é habitual nestas datas, a Acción Católica Xeral de Tui-Vigo (ACX) e organizaba esta celebración no seu oratorio de Vázquez Varela, seguida dun intre de convivencia para fortalecer os vínculos de unión entre as diferentes realidades da Igrexa de Tui-Vigo. Este ano, debido ás restricións sanitarias, tívose que suspender o momento de fraternidade e trasladouse a misa á parroquia de San José Obreiro para garantir as medidas de seguridade fronte á pandemia.
