Como é habitual, o terceiro domingo do mes de xullo, ás 12.00 horas, a parroquia de San Miguel de Bouzas celebrou a eucaristía solemne na honra ao Bo Xesús dos Aflixidos. Nesta ocasión, o encargado de realizar a ofrenda na honra ao Cristo foi o bispo emérito de Tui-Vigo, monseñor Luís Quinteiro. A eucaristía estivo presidida polo bispo tudense, monseñor Antonio Valín.
Durante a ofrenda, que ten lugar tras a lectura do Evanxeo, monseñor Luís Quinteiro presentou, ante a imaxe do Cristo dos Aflixidos, «o traballo das nosas mans; a madeira moldeada e o ferro transformado que enriquece os nosos produtos; o fío que, pacientemente, se anoada na rede; a suor que fecunda as tarefas do amencer laborioso, porque en cada esforzo deste pobo latexa a túa providencia». Durante a súa intervención, o prelado lembrou con especial agarimo as familias da industria pesqueira que, durante séculos, deron vida á vila de Bouzas.
O bispo emérito finalizou a súa intervención solicitando a bendición do bo Xesús para «quen goberna os portos; para os enxeñeiros e traballadores que innovan nos nosos estaleiros; para os científicos e mariñeiros que protexen os nosos caneleiros; para os voluntarios que salvan a vida no mar; e para que a túa Igrexa anuncie o Evanxeo e defenda con valentía os dereitos inviolables dos homes e mulleres do mal». Así, pediu a intercesión do Cristo para «que os nosos fogares sexan escolas de valores cristiáns onde floreza unha fractura do amor e o respecto que traia a paz a este mundo tan ensanguentado por guerras fratricidas que poñen en perigo os pobos máis pobres».
Durante os días previos á celebración da festa na honra ao Cristo dos aflixidos, a parroquia celebrou a novena. Pola tarde dese mesmo día, a imaxe do Cristo dos Aflixidos procesionou polas rúas da cidade.
