28 de Marzo de 2024

,

San Sixto III
28 de Marzo de 2024

,

San Sixto III

O ciclo de “Música Sacra na Soidade” fai significativas referencias ao sufrimento humano e á dor da guerra

O ciclo de “Música Sacra na Soidade” fai significativas referencias ao sufrimento humano e á dor da guerra

O vindeiro martes, día 29 de marzo, unha vez terminada a celebración  eucarística das 19 horas, o “Coro Clásico de Vigo”, que dirixe Joaquín Carvajal Baños, abrirá o ciclo de música sacra, que na coresma e proximidade da semana santa organiza a parroquia viguesa da Soidade (O Castro).  O sábado día 2 de abril completan o ciclo musical a Coral Polifónica Amadeus que dirixida por Norma  Urive cantará a misa e a continuación ofrecerá un breve concerto, tras o cal intervirá a Coral Apóstolo Santiago (Rimas  Zdanavicius).

O obxectivo deste ciclo, ademais de apoiar o gozo de retomar a volta á case normalidade das agrupacións corais, é levar a cabo nas actuais circunstancias unha homenaxe, e mesmo  unha oración de solidariedade e consolo, a tantas vítimas da dor e do sufrimento: as vítimas e familiares do naufraxio do pesqueiro “Villa de  Pitantxo”, engadíndose a esta horrible traxedia, aínda máis dor pola recente angustia de tantas familias afectadas pola invasión e a guerra de Ucraína… É a paixón de Cristo actualizada en tantos doentes. Contemplar as dores da paixón de Cristo actualizada nos seres humanos que sofren, sobre todo os máis inocentes, e unirse a eles solidariamente, pode ser un modo novo de entender a música sacra da Semana santa, a tolemia da Cruz, a Redención cristiá e ata a fraternidade universal…  

O primeiro dos concertos está dividido en dous partes. A primeira, “a  capella”, recolle escenas e personaxes da paixón de Cristo: que nos levan en obras de  T. Luís de Vitoria, desde o  Pueri  Hebreorum  do domingo de Ramos, á traizón de Xudas, pésimo  negociante, oíndo as  lamentacións de  Xeremías que nos levan xunto a María Dolorosa ao pé da Cruz (Stabat  Mater de  Kodaly) pero logo enche de alegría despois da Resurrección do seu Fillo (Regina  coeli  laetare).  

A segunda parte do concerto, con acompañamento de teclado, achega a pezas corais pertencentes a distintos séculos e ofrécense en orde cronolóxica para que poida apreciarse a evolución dos estilos musicais no tempo. Tras obras sacras soadas, como a  Cantata 147 de  Bach,  Panis  Angélicus de Frank ou o  Cantique de Jean  Racine de  Fauré e o Ave María de  J. Busto, chegará ao final o concerto, con dúas obras dedicadas á paz, tristemente hoxe tan necesaria como sempre. Un berro coral, máis que canto, ecoará en  Across  the  bridge (J.  Sandsstrom): “Dispersade as sementes da paz sobre a terra” e o Da  pacem (D.  Paulstich).

Facebook
Twitter
Email
WhatsApp