O mércores 28 de maio, os seminaristas da diocese de Tui-Vigo, que forman parte da comunidade do Seminario Maior Interdiocesano «Apóstolo Santiago», participaron no acto de clausura do Instituto Superior Compostelán e no Instituto Superior Compostelán de Ciencias Relixiosas, onde cursan os seus estudos en Teoloxía. Ao acto, que estivo presidido polo arcebispo de Santiago, monseñor Francisco José Prieto, tamén asistiu o bispo tudense, monseñor Antonio Valín.
Como é tradicional, a xornada comezou cunha eucaristía na capela do Seminario Maior. Na súa homilía mons. Prieto reflexionou sobre a procura da Verdade, obxectivo primeiro da teoloxía e tarefa permanente dos cristiáns. Alertou sobre o perigo de dirixir a vida polas pequenas verdades e lembrou que «Xesús nos prometeu o Espírito da Verdade que nos levará á luz plena. Temos que achegarnos á verdade de Deus mesmo».
Afirmou que «a verdade de Deus quérese achegar ao corazón do home. É a verdade de Deus a que vén ao noso encontro». Insistiu en que «a verdade de Deus orada e estudada ten que facerse vida e testemuño». Concluíu pedindo que «deixemos que se nos mostre a verdade crucificada de Deus. Fagamos da nosa vida a verdade que Deus nos desvela».
No acto académico impúxoselle a beca aos seminaristas que concluíron o ciclo institucional e alcanzaron o grao de bacharel en Teoloxía. Tamén recibiron un diploma e unha insignia os alumnos, entre eles unha laica, que terminaron o bienio en Teoloxía Fundamental.
Abriu as intervencións o director do ITC e reitor do Seminario Interdiocesano, José Antonio Castro Lodeiro, quen destacou que un obxectivo prioritario do centro é poñer a razón ao servizo da procura da verdade. Falou dunha “razón cordial”, como a vía de acceso a Deus propia do cristianismo. Unha procura na que é necesario aplicar todas as nosas facultades e mirar á realidade cos ollos do Evanxeo. Algo que, afirmou, «só se pode facer cando tomamos en serio a teoloxía e o seu estudo».
A continuación, tomou a palabra o director do ISCCR, o franciscano Miguel de la Mata, quen destacou que, aínda que o número de alumnos sexa estatisticamente pequeno, o importante é o seu entusiasmo, a súa fe e a súa conciencia de encarnar o “resto” bíblico. Lembrou que o Instituto ten como misión prioritaria a formación dos laicos. Neste sentido, repasou a oferta educativa do centro, que nos dous últimos anos tenta ir máis aló da formación regrada e ofrecer cursos especializados. Por último, afirmou que no ISCCR téntase formar a persoas capaces de contar a historia de Dios sen complexos, ensinar a ler a realidade desde a fe. Converternos nós mesmos en parábola significativa. Capacitámonos camiñando xuntos, para seguir a Xesús.
No acto houbo intervencións tamén dos representantes dos alumnos e dos padriños elixidos por eles. Clausurou o acto mons. Prieto, quen convidou a todos a indagar desde unha conciencia crente. Afirmou que a teoloxía ha de ser Deus mesmo que se desvela na humilde palabra humana.
O acto finalizou cun pequeno ágape nos corredores do Instituto Superior Compostelán.