Ante a proximidade da Semana Santa, Cáritas Val dá Louriña quere axudar a preparase para o gran acontecemento da fe: a Paixón, morte e resurrección de Xesús. Para iso, o próximo día 11 de abril, «venres de dores», ás 19.00 horas, organiza un Via Crucis que comezará no parque infantil do Porriño —xunto ao fornelo de Antonio Palacios— e finalizará na capela de Santo Benito.
O rezo do Via Crucis ofrece a oportunidade de percorrer o camiño de Xesús cara ao Calvario e, así, sensibilizar acerca das situacións de vulnerabilidade que, como Cristo, viven as persoas que acoden a Cáritas. Ao longo do ano, Cáritas Val da Louriña organiza diversas actividades co obxectivo de recadar fondos como os festivais benéficos no Nadal ou as «andainas solidarias».
Cáritas atende na Louriña a 70 familias. Co obxectivo de centrar a atención na persoa, recentemente, cambiou o seu tradicional modelo de axuda social de doazón de alimentos e roupa por un novo sistema de entrega de tarxetas económicas. Deste xeito, conséguese dignificar o proceso de atención, mellorando así a resposta ás necesidades e particularidades dos usuarios e usuarias. Ademais, nas parroquias de Salceda de Caselas, O Porriño e Mos, ofrecen talleres de formación e procura de emprego, atención a maiores ou clases de costura.
