Coincidindo coa celebración do «venres de dores», o 11 de abril, ás 18.30 horas, a parroquia de San Salvador de Teis acolle a presentación da restauración da cruz da súa Nazareno —imaxe da Semana Santa de Vigo 2025—. O alcalde da cidade olívica, Abel Caballero, fará entrega da cruz e, a continuación, o bispo, monseñor Antonio Valín, presidirá a eucaristía no templo parroquial.
Este proxecto forma parte do convenio marco entre o Concello de Vigo e a diocese de Tui-Vigo para o mantemento, conservación, restauración, difusión e divulgación do patrimonio cultural, histórico e artístico de titularidade eclesiástica situado no ámbito municipal de Vigo, asinado o 15 de maio de 2024 entre o alcalde Abel Caballero e o bispo emérito Mons. Luís Quinteiro.
De autor descoñecido, a imaxe do Nazareno de Teis , constituída por dous bloques de madeira policromada, foi doada no ano 1912 polo párroco daquel entón, Agapito F. Carreira. No ano 2010, a confraría do Noso Señor Xesús Nazareno e da Santísima Virxe das Dores realizou a primeira restauración da imaxe do Nazareno a cargo da empresa Bambalina Totana da cidade de Totana, en Murcia. Ata o de agora, non se realizou ningunha intervención sobre a cruz, cuxa madeira presentaba gretas e caruncho en zonas puntuais debido ao uso e a diversas causas naturais, como a humidade.
