Comezamos o mes de marzo, «mes das vocacións», aínda cos ecos do Congreso nacional de Vocacións, celebrado en Madrid, entre o 7 e o 9 de febreiro. A pesar de que só vinte e dúas persoas da diocese de Tui-Vigo puideron participar neste encontro, toda a Igrexa diocesana foi convocada a formar parte do congreso e, por iso, a delegación de Pastoral Vocacional organizou, no mes de decembro, un «pre-congreso»: un encontro para sentirse «Asemblea dos chamados» da diocese tudense.
Hoxe, no marco deste mes das vocacións, lembramos como foi a mañá do 14 de decembro, no Seminario Maior «San Xosé». Un centenar de persoas, entre elas o bispo de Tui-Vigo, monseñor Antonio Valín, asistiron á cita para «profundar na beleza da vocación compartida» e a descubrir esa alegría da fe que brota do sentirse amado e chamado por Deus.
