O mércores 19 de abril, a confraría do Santísimo Cristo da Vitoria celebrou a súa Asemblea Xeral Ordinaria tres anos despois de ter lugar a última, convocando a todos os seus confrades por primeira vez desde a pandemia.
Abriu o acto a presidenta, Dna. Marora Martín-Caloto, quen, agradecendo a presenza aos numerosos confrades, deu paso ao secretario da Confraría, D. Carlos Borrás, quen, tras ler a acta da última asemblea, fixo un repaso ás actuacións que ao redor do Cristo da Vitoria tiveron lugar o pasado ano, desde a Misa da Reconquista ata a novena, pregón, procesión e a celebración todos os terceiros venres de mes da Misa do Terceiro Venres. Informou tamén o Convenio de colaboración asinado co Concello de Vigo para sufragar os gastos derivados da procesión. Abordou así mesmo cuestións previstas para desenvolver ao longo deste ano, como a informatización e actualización do censo (que conta actualmente con preto de 800 confrades), para o que se pediu colaboración dos confrades en beneficio de mellorar estes datos. De igual modo, fixo fincapé na necesidade de promover a devoción ao Santísimo fomentando a chegada de novos confrades.
A continuación, o consiliario da confraría e párroco de Santa María, D. José Vidal Novoa iniciou a súa presentación agradecendo o labor levado a cabo polo anterior consiliario, D. Moisés Alonso Valverde; pola Xunta de Goberno da confraría, «que fai posible ese fermoso milagre que é a procesión, como explosión de fe»; e por Dna. Hortensia Dabarca Prieto. Enfocou o seu discurso en tres dimensións: por unha banda, fomentar o culto e devoción ao Santísimo, non só na Reconquista e Festividade, senón ao longo de todo o ano, facendo fincapé na celebración do Terceiro Venres e sen esquecer as exequias polos confrades defuntos; doutra banda, asumir compromisos caritativos cos máis necesitados; e, por último , promover a formación, non só na riqueza teolóxica, senón tamén na tradición e arte da confraría.
Antes de finalizar, tivo lugar un emotivo acto de recoñecemento a Dona Hortensia Dabarca Prieto agradecéndolle a súa dedicación á confraría durante 50 anos. A presidenta da Confraría fíxolle entrega dunha placa dedicándolles unhas merecidas palabras.
