Cunha misa solemne ás 18:30 horas da tarde do próximo mércores día 15, inaugurará oficialmente, o bispo de Tui-Vigo, Mons. Luís Quinteiro Fiuza, a colocación da imaxe do Sagrado Corazón de Xesús sobre a torre da ermida da Guía, que desde o pasado 11 de maio completa o proxecto previsto polos fieis de Teis para esa igrexa situada na parroquia da nosa Señora das Neves. A celebración retransmitirase a través da canle de YouTube da diocese de Tui-Vigo.
Como é sabido, a mediados do pasado século, a Irmandade da nosa Señora das Neves encargou ao arquitecto Manuel Gómez Román levar a cabo o proxecto dunha nova ermida —debido ao mal estado da anterior datada no século XVI—, para o que recolleu en parte a o soño e a ambiciosa proposta do gran arquitecto porriñés Antonio Palacios, que ideara un precioso templo dedicado ao Sagrado Corazón de Xesús, no alto do monte da Guía. Desde 1951 e ata o ano 1953, levaron a cabo as obras de construción da nova ermida que, por falta de recursos, acabou quedando inacabada, polo menos en canto á colocación no alto da torre dunha a imaxe do Sacro Corazón.
Desde o ano 2016, a comunidade parroquial, animada pola devoción e o apoio do párroco José Ramón Lera Alonso, propúxose levar a cabo a finalización da obra ideada por Gómez Román. Tras diversas e importantes intervencións nestes últimos anos para impedir a deterioración do templo, ao fin sete décadas despois, a ermida loce rematada pola talla do Sagrado Corazón en granito. A imaxe en perfecta consonancia co volume e estética da torre que a sostén, pesa 10 toneladas e ten 6 metros de altura. A súa creación e colocación ten a súa orixe nas peticións do párroco e os fieis de Teis que foron atendidas mediante o convenio asinado entre a diocese de Tui-Vigo, a Deputación provincial e o Concello vigués, os cales determinaron encargar a obra á Escola de Cantería da Deputación de Pontevedra.
