O luns 23 de xuño, o equipo do Centro Stella Maris de Atención ao Mariño en Vigo acolleu a visita do delegado da Pastoral do Mar da diocese de Mondoñedo-Ferrol, Juan Pablo Alonso, acompañado por un dos voluntarios, Sergio Díaz, e o bispo mindoniense, monseñor Fernando G. Cadiñanos. No Centro Stella Maris foron recibidos polo bispo tudense, monseñor Antonio Valín, e pola súa directora, María Larriba, xunto con algunhas voluntarias.
Durante a visita puideron coñecer as instalacións que a institución ten no porto e conversaron sobre as diferentes actividades que veñen realizando, así como dos proxectos futuros. Este diálogo serviu para comentar as dificultades, retos e esperanzas afrontadas durante os últimos anos no obxectivo de configurarse como lugar de referencia para os traballadores do porto e dos barcos que alí recalan, e como lugar de humanización e de axuda integral aos traballadores do sector do mar.