A cidade de Tui conmemorou o Venres Santo coa celebración da tradicional procesión e o abraiante acto do Santo Encontro, dous dos momentos máis significativos da Semana Santa tudense, que reuniron a numerosos fieis, confrades e visitantes nun ambiente de profundo recollemento.
O acto do Santo Encontro, relatado polo Prior da Irmandade do Moi Doce Nome de Xesús e Santa Casa de Misericordia, D. Santiago Freire, tivo lugar previamente á saída da procesión na praza de San Fernando, fronte á Catedral, constituíndo un dos momentos máis emotivos da xornada e congregando a un gran número de asistentes que seguiron con atención e respecto esta pasaxe da Paixón.
A procesión, organizada pola Irmandade do Moi Doce Nome de Xesús e Santa Casa de Misericordia, contou coa presenza de autoridades civís e militares, así como do Bispo, D. Antonio Valín, o Prior da Irmandade, D. Santiago Freire, o alcalde de Tui, D. Enrique Cabaleiro, o deputado do Parlamento de Galicia, D. Moisés Rodríguez, alén dos concelleiros e membros da corporación municipal, quen quixo acompañar á cidade nesta xornada de especial significado.
Ao longo do percorrido procesional, as distintas imaxes desfilaron polas rúas do centro histórico acompañadas, nun acto marcado polo respecto, o silencio e a solemnidade propios desta xornada.
A participación dos numerosos confrades, así como a implicación da comunidade, volveu poñer de manifesto o arraigamento destas tradicións en Tui, consolidando o Venres Santo como unha das xornadas máis salientables do seu calendario relixioso.
Desde a Irmandade quíxose destacar o compromiso e a implicación de todos os participantes, agradecendo especialmente a colaboración de quen fixo posible o correcto desenvolvemento da procesión.
A celebración do Venres Santo en Tui reafirma así a súa importancia como expresión de fe, tradición e convivencia, atraendo cada ano a máis persoas que desexan vivir de cercado estes actos cargados de significado.
