Desde hoxe e ata o venres, un centenar de expertos en Patrimonio de diferentes dioceses españolas están na diocese de Tui-Vigo para participar nas Xornadas nacionais de Patrimonio Cultural da Igrexa que organiza a Conferencia Episcopal Española (CEE), baixo o lema «Habitar a beleza: arte, territorio e transmisión da fe». Durante estes días, os participantes terán oportunidade de intercambiar experiencias e abordar temáticas de actualidade relacionadas co patrimonio eclesiástico.
A sesión inaugural tivo lugar no Museo de Arte Contemporánea de Vigo (MARCO) e contou coa presenza do bispo de Tui-Vigo, monseñor Antonio Valín; do arcebispo de Santiago de Compostela e presidente da subcomisión para o Patrimonio Cultural da CEE, monseñor Francisco José Prieto; do alcalde de Vigo, Abel Caballero; do Conselleiro de Cultura, Lingua e Mocidade da Xunta de Galicia, José López; e do director do secretario da subcomisión para o Patrimonio Cultural da CEE, Pablo Delclaux.
O bispo de Tui-Vigo, monseñor Antonio Valín, deu a benvida a todos os presentes, expresando a súa gratitude: «é unha verdadeira alegría e honra abrirvos as portas da nosa comunidade diocesana, especialmente nun marco tan singular como o que nos reúne. Estamos a vivir o VIII centenario da consagración da nosa catedral de Tui, momento para a renovación espiritual de toda a diocese e redescubrir a nosa identidade común».
Pola súa banda, o arcebispo de Santiago de Compostela e presidente da subcomisión para o Patrimonio Cultural da Conferencia Episcopal Española, monseñor Francisco José Prieto, declarou que o patrimonio cultural da Igrexa non debe entenderse unicamente como un conxunto de bens artísticos, monumentos ou tradicións, senón como unha herdanza viva nada da fe e chamada a seguir xerando vida e cultura. Así, o verdadeiro sentido do patrimonio alcánzase cando serve para transmitir a fe ás novas xeracións, converténdose nun espazo de encontro, diálogo e anuncio do Evanxeo. O desafío actual consiste en facelo accesible e significativo para a sociedade contemporánea, custodialo con responsabilidade e transmitilo con creatividade.
O patrimonio, fonte e ponte de evanxelización, hoxe
«Benvidos, “os Julio Verne” do Patrimonio diocesano español». Así daba comezo o xornalista e sacerdote, Alberto Cuevas, a súa conferencia «O patrimonio cultural e eclesial de Tui-Vigo: Ponte e fonte de evanxelización, hoxe», durante a que realizou unha rápida “tournée” pola historia, a cultura e o patrimonio da Igrexa tudense.
«O patrimonio da Igrexa non son obxectos, é unha experiencia habitada» expresou Alberto Cuevas, lembrando que a beleza é unha vía de acceso á procura do sentido; que, nunha cultura visual, a Igrexa posúe desde sempre unha linguaxe simbólica privilexiada; e que o territorio se pode converter nun espazo espiritual.
«Xesús quere habitar no tempo da nosa historia, das nosas vidas, da nosa humanidade»
Ás 20.00 horas, o arcebispo de Santiago de Compostela, monseñor Francisco José Prieto, presidiu a eucaristía na concatedral-basílica de Santa María en Vigo. Durante a súa homilía, convidou os presentes a descubrir catro espazos vitais que habitamos e nos que debemos deixarnos habitar: na biografía de cada persoa, na historia da humanidade, na esperanza e na cotiandade.
«Deixémonos habitar por aquel que é a Palabra, na túa vida, no cotián, no grandioso e o esplendoroso, na expresión dunha beleza que se fai historia, que se fai vida en cada un de nós. Recibémolo e acollámolo con sinxeleza. Énchenos de inmensa alegría o gozo de que, unha vez máis, Xesús quere habitar no tempo da nosa historia, das nosas vidas, da nosa humanidade», concluía o arcebispo compostelán.
Valença do Minho, Oia e Baiona, protagonistas da segunda xornada
Mañá, mércores, os participantes percorrerán Valença do Minho, cuxa vinculación coa diocese tudense remóntase ao século I. Alí, departirán sobre «A fisionomía do visitante: a identidade do viaxeiro», con Gustavo Ribeiro, director do departamento de Pastoral do Turismo da CEE. A continuación, visitarán a cidade fronteiriza.
Pola tarde, trasladaranse ao mosteiro do Císter en Oia, onde o párroco de Santa María, Daniel Goberna, ofrecerá unha visita pola igrexa seguida da conferencia «…Et debuxit eos. O claustro do mar». A última parada da xornada será en Baiona para visitar a vila xunto ao profesor da Universidade de Santiago de Compostela, Anxo Rodríguez.
A xornada finalizará coa procesión e misa na igrexa de Santa María de Baiona, presidida polo bispo emérito de Tui-Vigo, monseñor Luís Quinteiro.