No marco da Semana de Oración pola Unidade dos Cristiáns, a delegación de Ecumenismo e Relacións Interconfesionais da diocese de Tui-Vigo organizou un encontro con representantes da Igrexa ortodoxa, anglicana e evanxélica, o xoves 25 de xaneiro, no templo parroquial «María, nai do bo pastor». Á cita tamén acudiu Mons. Luís Quinteiro, bispo de Tui-Vigo, que destacou que «o noso testemuño ten que ser o camiñar xuntos», afirmando que o encontro «vai dar froito porque o mundo necesita a Xesucristo».
Ao longo do encontro, os representantes das diferentes confesións cristiás manifestaron a importancia de poñer a mirada nos elementos da fe que unen, para continuar crecendo e difundindo o amor de Xesucristo. O prelado tudense tamén destacou que «non podemos predicar a Xesucristo sen achegarnos a el, porque é a clave da nosa vida; se Xesucristo non é o centro, a nosa fe non ten sentido» e engadiu que «o mundo necesita que a nosa voz sinta e por iso é moi importante que esteamos aquí rezando».
Con este encontro de oración, a diocese de Tui-Vigo clausurou a Semana de Oración pola Unidade dos Cristiáns que se celebrou, do 18 ao 25 de xaneiro, baixo o lema «Amarás ao Señor, o teu Deus… e ao próximo como a ti mesmo».
