Máis dunha vintena de usuarios do comedor da Misión do Silencio —situado na rúa Urzaiz en Vigo— peregrinaron, o pasado 3 de xullo, á catedral de Santa María de Tui para celebrar o Ano Xubilar 2025, que o papa Francisco convocou baixo o lema «Peregrinos de esperanza». Esta peregrinación foi posible grazas a Cáritas Diocesana de Tui-Vigo, a delegación diocesana para o Xubileu e o equipo de acollida do templo catedralicia; ademais contou coa colaboración económica de Acción Social Empresarial (ASE).
Durante a mañá, os usuarios participaron nunha visita guiada pola catedral para coñecer a historia e a arte que rodean o templo. A visita concluíu cunha explicación didáctica do órgano barroco, seguida dun pequeno concerto.
O bispo de Tui-Vigo, monseñor Antonio Valín, acompañou ao grupo durante parte da xornada e presidiu a misa xubilar, durante a cal explicou que a fe necesita que abramos os ollos para ver a realidade de forma distinta e, así, descubrir a presenza de Cristo. Terminada a eucaristía, algúns peregrinos colocaron unha nova peza do quebracabezas que se está construíndo coa colaboración dos diferentes grupos que peregrinan á catedral para celebrar o Ano Xubilar.
Tras subir ás cubertas da catedral para admirar as vistas da cidade e a veiga do Miño, os usuarios da Misión do Silencio gozaron dunha comida de confraternización no restaurante «Cruceiro do monte». Antes de regresar, puideron pasear e admirar a natureza do monte Aloia.
Os organizadores desta actividade agradecen a colaboración de todas as persoas que contribuíron ao seu desenvolvemento e, de maneira especial, aos participantes e a ASE, pola súa colaboración económica que axudou a financiar esta actividade.
