Xa dispoñibles as conferencias das Xornadas Teolóxicas

Do 3 ao 5 de maio, o Centro Teolóxico «San Xosé» de Vigo organizou unhas Xornadas Teolóxicas que abordaron o tema da ministerialidade na Igrexa, entendida como unha concreción da Sinodalidade, tema tratado durante as xornadas do pasado ano 2022 Nesta ocasión, profundouse a ministerialidade desde tres perspectivas diferentes: Eclesiolóxica, Litúrxica e Novo Testamento.

Durante a inauguración destas Xornadas Teolóxicas, o bispo de Tui-Vigo, Mons. Luís Quinteiro, agradeceu ao Centro Teolóxico non só a organización destas xornadas, senón tamén os esforzos por garantir unha ampla oferta formativa —a través da DECA, de «Ágora: Escola de Teoloxía, ministerios e servizos», etc.—. Neste sentido, o prelado tudense salientou que «a formación laical é clave nestes momentos da Igrexa» e, dirixíndose a todos os asistentes procedentes de diferentes comunidades e realidades eclesiais, declarou que «a vosa presenza aquí é un sinal desa necesidade, porque vós non vides da nada. A comunidade é fundamental e, sen comunidades cristiás, non hai vida. Por tanto, nesas comunidades está o futuro da Igrexa»

O director do Centro Teolóxico, Guillermo Juan, tamén destacou durante estes días a importancia da «presenza» das persoas en todos os ámbitos —parroquial e diocesano— que, nalgúns momentos, significa «superar a comodidade». Así, agradeceu a presenza de todos os asistentes, que garante que o Centro Teolóxico poida continuar ofrecendo unha formación de alto nivel, a través de estar Xornadas Teolóxicas.

O encargado de inaugurar estas xornadas foi o profesor Fernando Rodríguez Garrapucho, co relatorio «A Ministerialidade na Igrexa: aproximación eclesiolóxica». Ao día seguinte, tomoulle a substitución o sacerdote Jaume González Padrós que impartiu a conferencia «A Ministerialidade na Igrexa: aproximación litúrxica». Finalmente, o teólogo Santiago Guijarro Porto clausurou estas xornadas coa conferencia «O ministerio apostólico segundo o Novo Testamento».